Nú er ég í flugi á leið til Búdapest. Já, það er internet um borð Frábært hjá Norwegian að hafa frítt net um borð. Nýja uppáhalds flugfélagið mitt.

Allavega. Þá ferð síðasta vikan mín af þessum fjórum að hefjast. Þetta er búið að vera skemmtilegt verkefni og vonandi verða síðustu 5 dagarnir það líka.
Það leiðinlegasta hingað til var rúmlega 4 tíma seinkun á fluginu mínu á föstudaginn sem eyðilagði nánast allan daginn fyrir mér. Það snjóaði svo hressilega í Búdapest að vellinum var hreinlega lokað þrátt fyrir ítrekaðar tilraunir mínar að fá ungverska kollega mína til að gefa minni vél séns á að lenda

Eitthvað verður maður að undirbúa skóbúðina á kvöldin en svo tekur maður törn með Þorra málara á föstudaginn og klárar þessa búð á einni helgi. Ekkert hangs.

Að lokum nokkrir punktar um Ungverjaland:

• Ungverjar borða gjarnan rjómatertur og brauðtertur í morgunmat
• Allan annan mat djúpsteikja þeir
• Ungverjar spila keilu með minni kúlu en venjulegt fólk, hún passar í lófann og er ekki með neinar holur fyrir puttana. Brautin er líka helmingi styttri.
• Ungverjum finnst bara fínt að vera berir að ofan í ræktinni (aðallega karlmenn)
• Ungverjar döbba allar bíómyndir og sjónvarpsefni með sínu “fallega” máli
• Beckham kamburinn sem var í tísku á Íslandi fyrir sirka 7 árum er sjóðheitur hér, snjóþvegnar gallabuxur líka
• Í einni verslunarmiðstöðinni hérna er svaka langur gangur á 3.hæð. Á ganginum eru fullt af leðursófum. Fólk kemur mikið og kelar í þessum sófum, um hábjartan dag.
• Ungverjar heilsast með handabandi á hverjum einasta degi. Ég tek í hendina á sirka 20 köllum á hverjum einasta degi, tilvalið fyrir kvefpestir að dreifa sér. Konurnar fá bara handaband ef þær rétta fram höndina, maðurinn má ekki krefja konuna um handaband.

seeya,
Hákon

Loksins fær maður að hitta krakkana og konuna aftur! Fer í flug í hádeginu og fæ að vera fim/fös/lau heima þessa helgina. Ætli maður taki ekki eitthvað fram hamarinn og byrji að smíða í skóbúðinni með Þorra Málara?

Loftið í anddyrinu á sundlauginni

Búdapest á það sameiginlegt með Reykjavík að hér finnst heitt vatn í jörðu. Heimamenn hafa því komið sér upp nokkrum sundlaugum. Ég skellti mér í eina þeirra í gær og þótti það nokkuð magnað. Þetta var líklega 100 ára gömul bygging sem minnti meira á dómkirkju en sundlaug. Ég sá einhverja 20 potta og laugar þarna inni, allt frá litlum 20°c kælipottum uppí stóra 50 manna heita potta, svo voru kannski 10 gufuböð og saunur líka. Úti var svo frábær útilaug í fullkomnum 39°c hita, djúp og með nuddstútum. Ég ákvað að skella mér í 50metra laugina og taka nokkur hundruð metra en ég fékk ekki að fara ofaní án sundhettu, það var jú 10 stiga frost og snjókoma.

Um kvöldið fór ég svo á Super-moto-cross keppni sem haldin var í sýningarhöll við hliðina á þjóðarleikvanginum. Þetta var nú meira supermoto-endurocross en hvað um það. Brautin var flott, gólfið lagt með spónarplötum og nokkrar þrautir og stórt stökk. Þetta var nokkuð vel sett upp hjá þeim, keppt var í crosshjólaflokki og supermotoflokki. Crosshjólin voru á einhverskonar götudekkjum eða endurodekkjum. Supermotohjólin fóru aðeins aðra leið en þau slepptu litlu stökkunum og trjádrumbunum.

Flott skemmtun, hressandi trial-sýning og fjórhjólasýning í hléum og þulurinn var örugglega fyndinn en ég skildi ekki eitt einasta orð. Standardinn á hjólurunum var ekki neitt frábær, ég hefði allavega ekki orðið síðastur