Loftið í anddyrinu á sundlauginni

Búdapest á það sameiginlegt með Reykjavík að hér finnst heitt vatn í jörðu. Heimamenn hafa því komið sér upp nokkrum sundlaugum. Ég skellti mér í eina þeirra í gær og þótti það nokkuð magnað. Þetta var líklega 100 ára gömul bygging sem minnti meira á dómkirkju en sundlaug. Ég sá einhverja 20 potta og laugar þarna inni, allt frá litlum 20°c kælipottum uppí stóra 50 manna heita potta, svo voru kannski 10 gufuböð og saunur líka. Úti var svo frábær útilaug í fullkomnum 39°c hita, djúp og með nuddstútum. Ég ákvað að skella mér í 50metra laugina og taka nokkur hundruð metra en ég fékk ekki að fara ofaní án sundhettu, það var jú 10 stiga frost og snjókoma.

Um kvöldið fór ég svo á Super-moto-cross keppni sem haldin var í sýningarhöll við hliðina á þjóðarleikvanginum. Þetta var nú meira supermoto-endurocross en hvað um það. Brautin var flott, gólfið lagt með spónarplötum og nokkrar þrautir og stórt stökk. Þetta var nokkuð vel sett upp hjá þeim, keppt var í crosshjólaflokki og supermotoflokki. Crosshjólin voru á einhverskonar götudekkjum eða endurodekkjum. Supermotohjólin fóru aðeins aðra leið en þau slepptu litlu stökkunum og trjádrumbunum.

Flott skemmtun, hressandi trial-sýning og fjórhjólasýning í hléum og þulurinn var örugglega fyndinn en ég skildi ekki eitt einasta orð. Standardinn á hjólurunum var ekki neitt frábær, ég hefði allavega ekki orðið síðastur

Héðan í Búdapest er allt fínt að frétta. Ég er búinn með 4 daga af þeim fjórum vikum sem ég verð hérna. Þetta eru spennandi tímar, landið er að fara á hausinn og allt að verða vitlaust í mótmælum og kröfugöngum. Ríkisstjórnin ritskoðar fréttirnar þannig að það eru bara alltaf fréttir af einhverju frábæru sem er að gerast en ekki þeim 50 þúsund manns sem safnast saman í miðbænum og grýta þinghúsið! Núna er aðalmálið að ríkisstjórnin er að senda 100 gamla hæstaréttardómara á eftirlaun og setja 100 nýja vini sína í staðinn í þeirra stöður. Kunnulegt ekki satt? (eftirlaunaaldurinn fyrir almúgann er svo lengdur um nokkur ár)

Einnig er viðskiptasnilld ríkisstjórnarinnar aðeins að skjóta þá í bakið þessa dagana. Þeir einkavæddu flugvöllinn fyrir nokkrum árum og seldu hann þýsku fyrirtæki fyrir nokkra milljarða. Ein klausan í samningnum var að ef ríkisflugfélagið Malev færi á hausinn myndi þeir greiða þýska fyrirtækinu skaðabætur sem er sirka jafn mikil og kaupverðið var! Um daginn lækkaði lánshæfi ríkisins og þ.a.l. Malev og þeir eiga ekki fyrir afborgunum lengur. Ríkið má ekki gefa Malev pening því Evrópusambandið bannar ríkjum að styrkja eitt flugfélag umfram önnur og það er hrikalega dýrt fyrir ríkið að setja flugfélagið á hausinn… hvað skal gera? Enginn veit.

En allt hitt er í góðum málum hérna. 8 til 12 stiga frost alla daga, logn og heiðskýrt. Reyndar er spáð mikilli snjókomu hér um helgina þannig að þetta er spennandi.

Ég er búinn að villast einu sinni og það var í neðanjarðargöngustígakerfinu…vá hvað maður er villtur þegar maður sér ekki til sólar

Eitt sem er magnað hérna eru sögufrægar byggingar. Rosaflott allt saman. Búinn að fara á tvö kaffihús sem eru í sirka 150 ára gömlum húsum sem líta út eins og hallir frá Sovétríkjunum eða Lúðvík XIV. Uppskriftirnar á súkkkulaðikökunum eru einnig aldagamlar og alveg hreint guðdómlegar.

Í vinnunni er allt í góðu. Þetta samstarf sem við erum í við Ungverjana er að virka vel!

Karen Erla

Karen Erla er byrjuð að æfa skauta. Hér er mynd af henni á annari skautaæfingunni sinni.